மாண்புமிகு பாரத பிரதமர் அவர்களுக்கு,
வணக்கம்.
பொருள்: நீலகிரி மாவட்டத்தில் எரிவாயு சிலிண்டர் விநியோக இடைவெளியை 45 நாட்களிலிருந்து 25 நாட்களாக குறைக்க கோரிக்கை – தொடர்பாக.
நான் கூடலூர் நுகர்வோர் மனிதவள சுற்றுச்சூழல் பாதுகாப்பு மையத்தின் செயலாளராக இருந்து, நீலகிரி மாவட்ட மக்களின் சார்பில் இந்த மனுவை சமர்ப்பிக்கிறேன்.
நீலகிரி மாவட்டம் பெரும்பாலும் அடர்ந்த வனப்பகுதிகளும், தேயிலைத் தோட்டங்களும் கொண்டதாகும். இங்கு வசிக்கும் மக்கள் பெரும்பாலும் தோட்ட தொழிலாளர்கள், கூலி தொழிலாளர்கள் மற்றும் பழங்குடியினர் ஆவர். இப்பகுதிகளில் யானை, புலி, சிறுத்தை, கரடி, காட்டு எருமை போன்ற வனவிலங்குகளின் நடமாட்டம் அதிகரித்து வருகிறது.
கடந்த பத்து ஆண்டுகளில் (2015–2025) தமிழ்நாட்டில் வனவிலங்கு தாக்குதல்களால் சுமார் 700 உயிரிழப்புகள் ஏற்பட்டுள்ளன. இதில் நீலகிரி மாவட்டம் முக்கிய பங்கு வகிக்கிறது. குறிப்பாக கூடலூர் பகுதியில் யானை–மனித மோதல் அதிகமாக உள்ளது.
இந்த சூழ்நிலையில், பொதுமக்கள் காட்டுக்குள் சென்று விறகு சேகரிப்பது மிகவும் ஆபத்தானதாக உள்ளது. இதனால் பல்வேறு உயிரிழப்புகள் மற்றும் பொருட்சேதங்கள் தொடர்ந்து நடைபெற்று வருகின்றன. 2026 ஏப்ரல் மாதத்தில் மட்டும் அனுமாபுரம், ஓவேலி பகுதிகளில் 2 உயிரிழப்புகள் ஏற்பட்டுள்ளன.
இதனால், விறகு அடிப்படையிலான சமையலை நம்ப முடியாத நிலையில், நீலகிரி மாவட்டத்தில் சுமார் 1.50 லட்சம் குடும்பங்கள் எரிவாயு சிலிண்டர்களை மட்டுமே நம்பி வாழ்கின்றன.
ஆனால் தற்போதைய மத்திய அரசு நடைமுறையின் படி, கிராமப்புறங்களில் எரிவாயு சிலிண்டர் விநியோகம் 45 நாட்களுக்கு ஒருமுறை மட்டுமே வழங்கப்படுகிறது. 14.2 கிலோ எடையுடைய ஒரு சிலிண்டர் சராசரியாக 25 முதல் 30 நாட்கள் மட்டுமே பயன்படுத்த முடிகிறது. இதனால் சுமார் 15 முதல் 20 நாட்கள் வரை குடும்பங்கள் சமையல் செய்ய முடியாமல் கடும் சிரமத்திற்கு உள்ளாகின்றனர்.
இதனால்,
சிறு குழந்தைகள், முதியவர்கள், கர்ப்பிணிகள் மற்றும் நோயாளிகள் உணவு பற்றாக்குறையால் பாதிக்கப்படுகின்றனர்.
பாலூட்டும் தாய்மார்கள் மற்றும் மருத்துவ தேவைகளுக்கான சூடான நீர், மருந்து தயாரிப்பு போன்றவை செய்ய முடியாமல் அவதிப்படுகின்றனர்.
தினசரி கூலி தொழிலாளர்களின் வாழ்க்கை கடுமையாக பாதிக்கப்படுகிறது.
மேலும், மக்கள் மீண்டும் விறகு சேகரிக்க முயற்சிக்கும் போது வனவிலங்கு தாக்குதலுக்கு ஆளாகும் அபாயம் அதிகரிக்கிறது. இது அவர்களின் அடிப்படை உணவு உரிமையை பாதிக்கும் நிலையை உருவாக்கியுள்ளது.
எனவே, நீலகிரி மாவட்டத்தை “சிறப்பு வகைப்பாடு” (Forest / Tribal / Difficult Area) பகுதியாக அறிவித்து, வனவிலங்கு அச்சுறுத்தலை கருத்தில் கொண்டு, மத்திய பெட்ரோலியம் மற்றும் இயற்கை எரிவாயு அமைச்சகத்தின் மூலம்,
எரிவாயு சிலிண்டர் விநியோக இடைவெளியை 45 நாட்களிலிருந்து 25 நாட்களாக குறைக்கவும்.
சிலிண்டர் விநியோகத்தை விரைவுபடுத்தவும்.
போதுமான அளவில் சிலிண்டர்கள் கிடைக்க நடவடிக்கை எடுக்கவும்.
என்று தாழ்மையுடன் கேட்டுக்கொள்கிறோம்.
நன்றி.
இப்படிக்கு,
(கையொப்பம்)
சிவசுப்பிரமணியம்
செயலாளர்,
கூடலூர் நுகர்வோர் மனிதவள & சுற்றுச்சூழல் பாதுகாப்பு மையம்
நீலகிரி மாவட்டம்.
No comments:
Post a Comment