குழந்தைக்கு உரைமருந்து கொடுக்கும் பழக்கம்

 

---------------------------------

 குழந்தைக்கு உரைமருந்து கொடுக்கும் பழக்கம்.

================

Dr.M.Chandran.Ph.D.

நாட்டு மருந்துக்குழு.

பிறந்த குழந்தைக்கு உரை மருந்து கொடுத்தால் எந்த நோயும் வராது. எப்படி, எவையெல்லாம் தரவேண்டும் என தெரிந்து கொள்வோம்.

தற்போதுள்ள நவீன மருந்துகள் இல்லாத காலத்தில் கூட நமது முந்தைய தலைமுறையினர் எல்லோருமே ஆரோக்கியமாகவே இருந்தார்கள் என்பதை மறுத்துவிட முடியாது. 

இன்றும் கிராமங்களில் குழந்தைகள் உரை மருந்து உதவியுடன் ஆரோக்கியமாக பெரும்பாலும் நோயில்லாமல் வளர்ந்து விடுகிறார்கள். குழந்தைக்கு உரை மருந்து கொடுப்பதால் குழந்தைகள் உடல்நலம் அதிகரிக்கவே செய்யும். உரை மருந்தில் பயன்படுத்தப்படும் பொருள்கள் என்ன, எந்த அளவில் கொடுக்கலாம் என்பது குறித்து தெரிந்துகொள்வோம்.

​வசம்பு -குழந்தைக்கான உரை மருந்து.

வசம்பு : பிறந்த குழந்தைக்கு கொடுக்கலாமா? வேண்டாமா?அவசியம் தெரிந்து கொள்ள வேண்டும்.

பிள்ளைவளர்த்தி என்று சொல்லகூடிய வசம்பு -வின் மருத்துவ குணத்தால் குழந்தைகள் ஆரோக்கியமாக வளர்வார்கள். வயிறு மந்தம், வயிறு உப்புசம், வயிறு வீக்கம், செரிமானம் என அனைத்தையும் போக்கும் வசம்பு குழந்தை பிறந்த 15 நாட்களிலேயே பயன்படுத்துவார்கள். 

ஆனால் அதை பயன்படுத்தும் அளவு குறித்து தெரிந்துவைத்திருக்க வேண்டும். இல்லையெனில் குழந்தைக்கு பேச்சு வருவதில் தாமதமும், பேச்சு திக்கி திக்கியும் பேசும்படியும் குறை உண்டாகிவிடும்.

நாட்டு மருந்து கடைகளில் பிள்ளை வளர்த்தி கிடைக்கும். அதை வாங்கி நல்லெண்ணெய் தடவி நல்லெண்ணெய் விட்டு ஏற்றிய அகல் விளக்கில் சுட்டு பிறகு பயன்படுத்த வேண்டும். ஒரு மூறை சுட்டால் இதை 5 முறை பயன்படுத்தலாம்.

​கடுக்காய் -குழந்தைக்கான உரை மருந்து.

வாய், தொண்டை, இரைப்பை , குடல், கல்லீரல் சக்தியை ஊக்குவிக்ககூடியவை, பசியை தூண்டும், ரத்தத்தை சுத்த செய்யும். வாதம், பித்தம், கபம் மூன்றையும் சமநிலைப்படுத்தும். உடலுக்கு வலிமைதரக்கூடியது. இரைப்பு நோய் வராமல் காக்கும். வயிற்றுப்பொருமலை குணப்படுத்தகூடியது. அஜீரணக்கோளாறை சரிசெய்யும். இனிப்பு, புளிப்பு, கசப்பு, துவர்ப்பு, கார்ப்பு சுவைகள் அடங்கியவை.

கடுக்காய் நாட்டு மருந்துகடைகளில் கிடைக்கும் அதை வாங்கி வேகவைக்க வேண்டும். நெல் அவிக்கும் போது இதை வெள்ளைத்துணியில் முடிந்து வேகவிடவேண்டும். அல்லது சாதத்தை வேகவைக்கும் போது அதில் அப்படியே போட்டும் வேகவைத்துஎடுக்கலாம். அரை வேக்காடு வெந்தால் போதும். தொட்டு பார்த்தால் காய் அமுங்க வேண்டும்.

​மாசிக்காய் -குழந்தைக்கான உரை மருந்து.

வயிற்றுப்புண்ணை குணப்படுத்தும். ஈறுகளுக்கு வலிமை தரும். உடலில் இருக்கும் நச்சுக்களை நீக்கும். சிறுநீர் பெருக்க உதவும். வயிற்றுபோக்கு கட்டுப்படுத்தும். சீதபேதி பிரச்சனை இருக்கும் போது வெறும் மாசிக்காயை மட்டுமே உரசி தேனில் குழைத்து நாக்கில் தடவினால் அவை கட்டுப்படும்.

நாட்டு மருந்து கடைகளில் கிடைக்கும் மாசிக்காயை வாங்கி முன்பு சொன்னது சோறு வேகவைக்கும் போது வேக வைத்து எடுக்க வேண்டும். அரை வேக்காடு வெந்தால் போதும். தொட்டு பார்த்தால் காய் அமுங்க வேண்டும்.

​ஜாதிக்காய் -குழந்தைக்கான உரை மருந்து.

குழந்தைக்கு சுவை உணர்ச்சி கொடுக்கும். செரிமானத்தை வேகமாக்கி ஜீரண சக்தியை அதிகரிக்கும். சில குழந்தைகள் தூங்காமல் சிடுசிடுவென்று அழுதபடி இருப்பார்கள். இதை கொடுக்கும் போது குழந்தைக்கு நிம்மதியான தூக்கம் தரும். குழந்தைகள் சூடாக மலம் கழிப்பதை தடுக்கும். வாயுத்தொல்லை இல்லாமல் காக்கும்.

ஜாதிக்காய் நாட்டு மருந்துகடைகளில் கிடைக்ககூடியதே. இதையும் சோறு வேகவைக்கும் போது வேகவைக்க வேண்டும். அரை வேக்காடு வெந்தால் போதும். தொட்டு பார்த்தால் காய் அமுங்க வேண்டும்.

​சித்தரத்தை, சுக்கு - குழந்தைக்கான உரை மருந்து.

உடலில் கபம் சேராமல் பாதுகாக்கும். குழந்தைக்கு சளி இருக்கும் போது இதை ஒரு உரைப்பு சேர்த்து கொடுக்கலாம். நெஞ்சிலிருக்கும் சளி, கோழையை வெளியேற்றும். மூச்சுக்குழாயில் சளி இருந்தால் அதை கரைத்து வெளியேற்றும் தன்மை கொண்டவை. ஆனால் குழந்தைக்கு தொண்டைப்புண், வறட்டு இருமல் இருந்தால் தவிர்ப்பது நல்லது.

சுக்குவும் உரை மருந்தில் சேர்க்கலாம். ஆனால் ஒரு சிட்டிகையில் ஆறில் ஒரு பங்கு அளவு மட்டுமே சேர்க்கவேண்டும் அளவு தெரியவில்லையெனில் சேர்க்க வேண்டாம்.

​பூண்டு, மிளகு, கட்டிபெருங்காயம்-குழந்தைக்கான உரை மருந்து.

இந்த மூன்றையும் அப்படியே சேர்க்க போகிறோம். நாட்டு மருந்துகடையில் உரைகல் கிடைக்கும். 

அதை வாங்கி வைத்துக் கொள்ளுங்கள். குழந்தையை குளிப்பாட்டியதும் உரைகல்லில் வசம்பு, ஜாதிக்காய், மாசிக்காய், கடுக்காய், சித்தரத்தை, பூண்டு, மிளகு, பெருங்காயம் அனைத்தையும் ஒரு முறை உரைக்க வேண்டும். பிறகு அதை வழித்து தாய்ப்பாலில் கலக்க வெண்டும். இதை குழந்தைக்கு அப்படியே கொடுக்க வேண்டும்.

(மிளகு, பூண்டு ஒரு உரை மட்டுமே கவனம்) 

பிறகு பத்து நிமிடங்கள் கழித்து குழந்தைக்கு தாய்ப்பால் கொடுக்கலாம். வாரம் இரண்டு அல்லது மூன்று முறை கொடுத்தாலே போதும். ஒரு வேளை மட்டுமே கொடுப்பது நல்லது.

பொதுவான செய்தி.

---------------------------------

குழந்தைக்கு இரண்டு மாதமாகும் போது இந்த உரை பொருள்களை இரண்டு முறை உரையுங்கள். மூன்று மாதமாகும் போது மூன்று முறை உரையுங்கள். அவ்வளவு தான். பிறகு குழந்தை வளர்ந்தாலும் இதே அளவு உரைத்து கொடுங்கள்.

================

Dr.M.Chandran.Ph.D.

நாட்டு மருந்துக்குழு.

================